Welkom by die Afrikaanse Protestantse Kerk Pretoria-Oos
Webskakels
Jongste nuus
Nuwe Preekpunt in Pretoria-Oos: ‘n Historiese Mylpaal
Sondag 24 Mei 2026 sal onthou word as ‘n besondere dag in die geskiedenis van AP Kerk Pretoria-Oos. Om 18:00 het die eerste diens van ons nuwe preekpunt by CVO Skool Pretoria in die ooste van Pretoria plaasgevind. Ongeveer 20 belangstellendes het hierdie geskiedkundige geleentheid bygewoon en saam die begin van ‘n opwindende nuwe bediening beleef.
Die diens is gelei deur ds. Attie Boshoff, wat gepreek het uit Handelinge 28 met besondere fokus op vers 31. Hierdie slotvers van die boek Handelinge beskryf hoe die apostel Paulus in Rome die Koninkryk van God verkondig het en die Here Jesus Christus geleer het “met volle vrymoedigheid, sonder enige verhindering”. Hierdie Skrifgedeelte het op gepaste wyse die toon aangegee vir die nuwe preekpunt se bediening en visie: die onbelemmerde verkondiging van God se Woord in ‘n tyd waarin die wêreld steeds meer behoefte het aan die waarheid van die Evangelie.
Die kerkraad van AP Kerk Pretoria-Oos het die besluit geneem om reeds nou ‘n preekpunt in hierdie gebied te vestig met die oog op die toekomstige ontwikkeling van die omgewing. Met Akademia se nuwe universiteitsgronde, wat na verwagting in 2028 in gebruik geneem sal word, is die doel om teen daardie tyd reeds ‘n gevestigde en bekende geestelike tuiste in die gemeenskap te wees.
Ons droom is dat hierdie preekpunt nie net ‘n plek van aanbidding sal wees nie, maar ook ‘n geestelike hawe vir studente wat na betekenis en waarheid soek, asook vir die breër gemeenskap van Pretoria-Oos. Ons begeerte is dat mense hier die suiwere verkondiging van die Woord sal vind, geestelik sal groei en ware gemeenskap met mede-gelowiges sal ervaar.
Die visie van die preekpunt is om klassieke gereformeerde prediking te bied wat getrou aan die Skrif bly, maar terselfdertyd aktuele temas aanspreek wat relevant is vir die uitdagings en vrae van ons tyd en veral onder die jongmense. Die gereformeerde liturgie sal gehandhaaf word.
Aanvanklik sal die dienste nie elke Sondagaand plaasvind nie, maar op geselekteerde datums. Soos die bediening groei en die behoefte toeneem, sal die moontlikheid van meer gereelde of selfs weeklikse dienste oorweeg word. Ons vertrou dat die Here self hierdie werk sal seën en uitbou volgens Sy wil.
Ons nooi almal uit om saam met ons te droom oor wat die Here in Pretoria-Oos kan doen. Bid saam met ons vir hierdie nuwe bediening, ondersteun dit waar moontlik, en wees deel van die opbou van ‘n gemeente wat die lig van die Evangelie helder sal laat skyn in hierdie groeiende deel van ons stad.
Kom droom saam met ons oor die toekoms van die Evangeliebediening in Pretoria-Oos.
Met die diens van 7 Junie het die bywoningsgetal mooi aangegroei na om en by 30 lidmate. Die datums vir die volgende dienste is 26 Julie, 23 Augustus, 20 September en 25 Oktober.
(Oudl. Hendrik Eksteen)